घर नजिकै हामीले थुप्रै मासु पसल देखिरहेका हुन्छौँ। कतिपयको त यो पुस्तौली व्यवसाय पनि हुन्छ भने कतिले भर्खरै खोलेका हुन्छन्। पुरानो पसल होस् या नयाँ पसल, दुबैले मासुको गुणस्तरमा पनि ध्यान दिनुपर्ने हुन्छ। बजारका अधिकांश पसलहरूमा सरसफाइको कमी भएको गुनासो ग्राहकहरूले गरिरहेका हुन्छन्। सरसफाइ नहुँदा मासुको गुणस्तर नराम्रो हुन्छ। त्यसले विभिन्न रोगहरू निम्त्याउन सक्छ जसको असर फेरि व्यवसायमा नै पर्छ। ग्राहकहरू दोहोर्याएर नआउन सक्छन्। त्यसैले मासु पसल गर्ने र गर्न चाहने व्यक्तिहरूलाई मासुको गुणस्तर कसरी कायम राख्ने भन्ने बारे थाहा हुनु अति आवश्यक देखिन्छ। यो लेखमा हामी त्यही विषयमा कुराकानी गर्दछौँ। 

पसलमा काम गर्दा पन्जाको प्रयोग गर्ने

पन्जाको प्रयोग गर्नाले आफ्ना हातमा भएका कीटाणु मासुमा सर्न पाउँदैनन्। 

पन्जामा पनि सुतीको पन्जा प्रयोग गर्ने। यसले मासुको पानी सोच्ने काम गर्छ जसका कारण मासु समात्दा हातबाट चिप्लिएर खस्दैन। साथै यसको प्रयोगले काम गर्दा हातमा ठेला पनि उठ्दैन।

यस्ता पन्जालाई धोएर फेरी प्रयोग गर्न सकिन्छ। यसका लागि पन्जालाई एक रातसम्म सरफमा धड्याएर उमाल्ने र सुकाएपछि यसलाई फेरी प्रयोगमा ल्याउन सकिन्छ।

मासु काट्दा चपीङबोर्डमा राखेर काट्ने

सामान्यतया हामीले पसलहरूमा अचानोमा मासु काटेको देख्छौँ। अचानोमा काट्दा मासुमा अचानोको धुलो टाँसिने समस्या हुने गर्छ। त्यस्तो अचानोमा अगिल्लो दिनको मासुको टुक्राहरू रहेर फोहोर हुने सम्भावना हुन्छ। सफा छुरीले चपिङबोर्डमा राखेर काट्ने हो भने सजिलो र सफा रूपमा मासु काट्न सकिन्छ

चपिङबोर्डलाई नियमित सफा गर्न सजिलो हुन्छ। साथै यसलाई फ्रिजमा पनि सजिलै राख्न सकिन्छ।

बोनलेस मासुलाई छुट्ट्याउने

बोनलेस अथवा हड्डी नभएको मासु छुट्ट्याएर त्यसको किमा बनाउन सकिन्छ। यस्तो मासु विशेष गरी म:म बनाउनका लागि होटेल रेस्टुरेन्ट व्यवसायीहरूले खोज्ने गरेको देखिन्छ। किमा बनाउन बजारमा छुट्टै मेसिन पाइन्छ। यसका लागि सुरुमा मासुमा भएका हड्डी छुट्ट्याउनु पर्छ। अनि मेसिनको प्रयोगबाट सुरक्षित तरिकाले किमा बनाएर प्याक गर्न सकिन्छ।

काटीसकिएको मासुलाई प्याकिङ गर्ने

मासु भनेको हावामा भएका अनगिन्ती कीटाणुका लागि उत्तम खाना हो। त्यी कीटाणुहरू उचित तापक्रमको पर्खाईमा हुन्छन्। तापक्रम उचित पाउने बित्तिकै उनीहरू फैलिन थाल्छन् र मासु गनाउन थाल्छ। मासुको रङ्ग परिवर्तन हुनुका साथै वजन पनि कम हुँदै जान्छ। यसो हुन नदिनका लागि काटिएको मासुलाई सफा पानीमा राम्रोसँग पखाल्नुपर्छ। पखालेर एल डी पी प्लास्टिकमा प्याक गरेर राख्दा उत्तम हुन्छ। यस्तो प्लास्टिक बजारमा सजिलै पाइन्छ।

प्याकिङ दुई किसिमले गर्न सकिन्छ। एउटा लुज प्याकिङ र अर्को भ्याकुम प्याकिङ। थोरै समयको लागि राख्ने हो भने लुज प्याकिङ र धेरै समयका लागि हो भने भ्याकुम प्याकिङ उपयुक्त हुन्छ। यसरी मासु प्याक गर्नका लागि बजारमा मेसिनहरू पाइन्छन्।

प्याक गरिएका मासुलाई फ्रिजमा राख्ने

फ्रिजमा मासु राख्दा उचित तापक्रम मिलाउन आवश्यक हुन्छ। कुखुराको र बङ्गुरको मासु -८० डिग्रीमा राख्ने हो भने एक वर्षसम्म खान मिल्ने हुन्छ र -३० डिग्री सम्म राखियो भने २ वर्षसम्म खान लायक हुन्छ। खुल्ला छोड्दा भोलि पल्टै बिग्रिने मासु पनि यसरी प्याक गरेर फ्रिजमा राख्ने हो भने एक वर्ष सम्म बेच्न सकिन्छ। फ्रिजमा धेरै समय राखेर जमेका मासुलाई काट्न समस्या हुन सक्छ। यसरी जमेका मासु काट्ने मेसिन पनि बजारमा पाइन्छ। यसलाई हड्डी काट्ने मेसिन भनिन्छ। 

यसरी मासु व्यवसायलाई आधुनिक रूपमा सञ्चालन गर्न सकिन्छ। कोरियाबाट फर्किएर काठमाण्डौको बल्खुमा आधुनिक मासु पसल सञ्चालन गरिरहेका रुद्र कुमार राईसँगको कुराकानीको क्रममा यो लेख तयार पारिएको हो। 

मासु पसल कसरी गर्ने भन्ने कुरा विस्तृतमा सुन्नको लागि तलको भिडियो हेर्नुहोस्:  

0
0
0
s2sdefault

भिडियो प्रतियोगिता- पुरस्कारमा एक लाखसम्म!

हाम्रो युट्युब!

 

 

कृषि उत्पादन यहाँ बेच्नुहोस् !