इन्टरनेटको माध्यमबाट विभिन्न सूचना वा जानकारी दिने माध्यम वेबसाइट। यो विद्युतीय सूचना प्रणाली अर्थात् एक किसिमको सञ्चारमाध्यम हो। व्यवसाय सञ्चालन गर्ने व्यक्तिले आफ्नो व्यवसायको वेबसाइट निर्माण गरी सम्बन्धित सबैलाई सूचना वा जानकारीहरू दिइरहन सक्दछन्।
वेबसाइटको माध्यमबाट एकै पटकमा र एकै ठाउँमा बसेर थुप्रै मानिसहरूलाई सूचनाहरू पठाउन सकिन्छ। व्यवसायलाई सफलताका साथ सञ्चालन गर्न, प्रवर्धन तथा विस्तार गर्न वेबसाइटले ठूलो मद्दत पुर्याउँछ। यसले ग्राहक तथा उपभोक्ताहरूमा आफ्नो पहिचान र विश्वसनीयता विकास गर्न सहयोग गर्दछ। यो प्रविधिको जमानामा त सबै व्यवसायीहरूको लागि वेबसाइट अनिवार्य भैसकेको छ।
वेबसाइटबाट व्यवसाय सञ्चालनमा हुने फाइदाहरू:
- वेबसाइटले व्यवसायको चिनारी र पहिचान बढाउँछ। साथै सेवा तथा उत्पादनहरूको बारेमा जानकारी दिन्छ।
- ग्राहक तथा उपभोक्ताहरूमा व्यवसायप्रतिको आकर्षण बढाउँछ।
- छोटो समयमा आफ्नो व्यवसायका बारेमा धेरै मानिसहरूसम्म सूचना वा जानकारीहरू पुर्याउन सकिन्छ।
- चाहेको समयमा सूचनाहरू प्रसारण गरिरहन सकिन्छ।
- व्यवसाय सम्बन्धमा उपभोक्ता वा सम्बन्धित सरोकारवालाहरूका चासो तथा जिज्ञासाहरूको जवाफ दिन सकिन्छ।
- अन्य व्यवसायीहरुसँग प्रतिस्पर्धा गर्न सकिन्छ।
व्यवसायको वृद्धि र विस्तार गर्न वेबसाइट सजिलो माध्यम हो तर, यसको डिजाइन गर्न अथवा खोल्न प्राविधिक ज्ञानको आवश्यकता पर्दछ। आफूसँग त्यस्तो ज्ञान नभएको खण्डमा सीप भएको मानिसलाई पैसा तिरेर बनाउन लगाउनु पर्दछ। बनाइसकेपछि त्यसलाई अद्यावधिक (अपडेट) गरिरहनु पर्दछ, अर्थात् नयाँ-नयाँ सूचना वा जानकारीहरू राखिरहनु पर्दछ। यो निर्माण भएपछि यसको सञ्चालनका अर्थात् यसबाट प्रवाह गरिने सूचना तथा जानकारीहरूको लागि भने विद्युतीय विधिहरूको प्रयोग तथा साइबर सञ्चालन सम्बन्धी नीति नियमहरूको पालना गर्नु पर्दछ।